تاند:( جمعه، د ميزان شپاړسمه) د طالبانو د اسلامي امارت يو لوړپوړی پلاوی نن له کابل څخه قطر هېواد ته تللی.
د طالبانو وياند ذبيح الله مجاهد وايي، چې د دغه پلاوي مشري د دوی د بهرنيو چارو وزير امير خان متقي کوي.
ويل شوي، چې د اطلاعاتو او فرهنګ وزارت سرپرست ملا خيرالله خيرخواه، د استخباراتو سرپرست عبدالحق وثیق او يوشمير نور طالب چارواکي هم په دې پلاوي کې شامل دي.
مجاهد د سفر موخه د افغانستان د وضعیت په اړه له قطري چارواکو سره خبرې اترې دي.
د یاد شوي سفر په تړاو نور جزییات نه دي ورکړل شوي.
طالبان په وروستيو کې د دوی د اسلامي امارت د په رسميت پېژندلو لپاره هڅې چټکې کړي، خو ظاهرا يې د کوم هېواد ملاتړ په دې برخه کې نه دی ترلاسه کړی.
قطر، چې له ډېرو کلونو راهيسې یې طالبانو ته سياسي دفتر پرانيستی و او له نيږدې ملاتړو څخه يې دی، د طالبانو له کړنو او واکمنۍ ناراضه ښکاري.
دغه هېواد په وروستيو کې د طالبانو د خپلمنځیو اختلافونو يادونه هم کړې او ويلي، چې دوی د خپلمنځیو ناندريو له کبله په سمه حکومتولۍ نه دي توانېدلي.