تاند:( دوشنبه، د ميزان دولسمه) د طالبانو سرپرستې کابينې په هېواد کې د الیکترونيکي تذکرو او پاسپورټونو د بهير د بيا پيلولو خبر ورکړی.
د طالبانو د اسلامي امارت وياند ذبيح الله مجاهد پر خپل ټویټر ليکلي، چې یاده پريکړه نن د سرپرستې کابينې په غونډه کې شوې ده.
سرچينې زياته کړې، چې په دې برخه کې د کورنيو چارو وزارت ته لارښوونه شوې، څو یاد شوی بهیر را پيل کړي.
ذبيح الله مجاهد د دغه بهير د پيل دقیق وخت نه دی په ډاګه کړی.
د الیکترونيکي تذکرو او پاسپورټونو د وېش د ځنډ له کبله ګڼو افغانانو د ګڼو ستونزو له کبله شکايت درلود.
طالبانو نه دي ويلي، چې تذکرې او پاسپورټونه به د افغانستان د پرځول شوي اسلامي جمهوريت او که د خپل اعلان کړي اسلامي امارت په نوم ورکوي؟
مخکې د دوی وياند ذبيح الله مجاهد ویلي و، چې پخوانۍ تذکرې او پاسپورټونه هم اعتبار لري، خو دوی ممکن د خپل امارت په نوم تذکرې او پاسپورټونه ووېشي.
د دغې برخې متخصصين بيا دا بدلون ممکن نه ګڼي او زياتوي، چې تذکرې او پاسپورټونه به په پخواني نوم او لوګو ورکړل شي، ځکه طالبان یې د نوم او لوګو بدلولو اقتصادي او نړیوال حقوقي امکانات او پرستیژ نه لري.