طالبانو بګرام اډې ته د چينايي سرتېرو راتګ رد کړی

تاند:( يکشنبه، د ميزان يوولسمه) د طالبانو د اسلامي امارت مرستيال وياند بلال کريمي بګرام اډې ته د چينايي سرتېرو د راتلو آوازې رد کړي.

نوموړي په دې اړه خپاره شوي راپورونه ناسم او بې بنسټه ګڼلي.

د هغه په وينا، د چینایانو په ګډون د هيڅ هيواد سرتېرو ته به افغانستان ته د راتلو اجازه ورنه کړل شي.

د راپورونو مطابق، تېره شپه د بګرام اډې مړه څراغونه د امريکايي سرتېرو له وتلو وروسته په لومړي ځل روښانه شول.

دا پوځي اډه مخکې له مستقلې بريښنا څخه برخمنه وه او د ازبکستان وارداتي بريښنا څخه نه روښانه کيده.

ځينو سرچينو د ځايي خلکو په حواله وويل، چې د دغې اډې مخته یې چینایي سرتېرو ته ورته بهرنيان هم لیدلي.

طالبانو بيا دا راپورونه بې بنسټه ګڼلي دي.

بګرام پوځي اډه په افغانستان کې د امریکا د پوځي حضور په وخت کې د دوی تر ټولو لویه پوځي اډه وه.

دا پوځي اډه د کابل په شمال کې ‌موقعیت لري او په تشکیلاتي لحاظ د پروان د بګرام ولسوالۍ اړوند دی.

چین افغانستان ته د خپلو سرتېرو د استولو ادعا ته کوم غبرګون نه دی ښودلی.

څه موده مخکې يو شمېر بهرنيو رسنيو ويلي وو، چې د امريکايي سرتېرو له وتلو وروسته به د بګرام پوځي اډه چین ته وسپارل شي، خو طالبانو دا ادعا رد کړې وه.