تاند:( پنجشنبه، د ميزان اتمه) د طالبانو حکومت ويلي، چې کابل هوايي ډګر ته به به نن نړيوال پروازونه پیل شي.

د طالبانو يوه وياند احمد الله وثیق وايي: ‏د نړیوال رادار دمعلوماتي پاڼې له‌مخې سر له پنجشبې ورځې کابل ته نړیوالې الوتنې پيلېږي.

د سرچينې په حواله، ترکیه، هند او ازبکستان درې هغه هېوادونه دي چې د پنجشنبې په ورځ به ترې درې مسافر وړونکې الوتکې دکابل هوايي ډګر ته الوتنې وکړي.

يادو هېوادونو په دې اړه څه نه دي ویلي.

کابل نړيوال هوايي ډګر د طالبانو له واکمنیدو او د دوی له وېرې د لسګونه زره افغانانو د تېښتې د تاريخي بې نظمۍ له وجې سخت زيانمن شو.

ويل شوي، چې دغه هوايي ډګر ته د بې نظمۍ په وخت کې تر ۱۰۰ ميليونه ډالرو تاوان رسیدلی.

طالبانو اوس د ځينو هېوادونو په مرسته د دغه هوايي ډګر د بيا فعالولو خبر ورکړی.