تاند( چارشنبه، د سنبلې ۳۱ مه) د طالبانو د اسلامي امارت لوی درستیز مولوي فصیح الدین هغه ادعاوې رد کړې، چې ګواکې د پنجشېر ولایت په نیولو کې د پاکستان پوځ ورسره ملګری و.
نوموړي د بدخشان مرکز ته د سفر پرمهال په یوه غونډه کې ویلي، چې پنجشېر ولایت طالبانو په یوازې ځان نیولی او د پاکستان د ملتیا خبره ورسره بې ځایه ده.
طالب لوی درستیز دغه راز زیاته کړې، چې له امریکا څخه د پاتې وسلو او تجهیزاتو څخه په استفادې سره به طالبان یوه پياوړې اردو رامنځته کړي.
مولوي فصیح الدین، چې د بدخشان ولایت له تاجیکانو څخه دی او پر پنجشېر یې د طالبانو د برید مشري کوله، په پنجشېر کې اوس د امنیت خبر ورکوي.
د ده په خبره د پنجشېر خلک په خوندي ډول د طالب امارت تر سیوري لاندې ژوند کوي.
د هغه څرګندونې په داسې حال کې دي، چې په پنجشېر کې د مقاومت ملي بهیر یوه قومندان صالح محمد ریګستاني وسله وال طالبان په پنجشیر کې د بشري حقونو په نقض تورن او وویل، چې یاده ډله د پنجشېر ځوانان له نیولو وروسته د کاپېسا زندان ته د سختو شکنجو لپاره وړي.
طالبانو بیا دا راپور رد کړی.
دوی دغه راز پر پنجشېر ولایت په شوي برید کې د پاکستان د لاس لرلو په اړه هم د مقاومت ملي جبهې ادعاوې بې بنسټه ګڼلي دي.