تاند(سې شنبه، د سنبلې ۳۰) هندي چارواکي وايي چې له افغانستان څخه د ۲ ملیارده او ۷۰۰ ملیون ډالرو په ارزښت هیروینو قاچاق یې نیولی دی.
د هند د امنیتي چارواکو په وینا، دا هیروین یې د خپل هیواد د لوېدیځ په سمندري بندر کې له دوو تنو هندیانو سره یوځای په دوو کانتینرونو کې نیولي دي.
د ګوجرات ایالت د عواید او ګمرکونو د ادارې رييس وايي، په موندرا بندر کې یې په یوه کانتینر کې ۲ زره کیلوګرامه او په بل کې ۱۰۰۰ کیلومه هیروین کشف کړي دي. د ده په وینا دا هیروین د ایران له یوه بندره د ګوجرات موندرل بندر ته راوړل شوي وو.
هندي چارواکي وايي چې اوس په احمداباد، ډیلي، چینای، ګندهیدهم او د ګوجرات په ماندوی کې پلټنې روانې دي.
د ګوجرات ایالت د عوایدو او ګمرکونو د ريیس په وینا، د کشف شویو هیروینو ارزښت ۲۰۰ ملیارده هندي روپۍ یا ۲ ملیارده او ۷۰۰ ملیون امریکايي ډالره اټکلېږي.
پلټنې ښيي چې د قاچاق په دې ستره قضیه کې یو افغان هم لاس لري خو تراوسه پورې له دوو هندیانو پرته بل څوک نه دی نیول شوی.