تاند (دوشنبه، د سنبلې ۲۲مه) — طالبان وایي چې د ولسمشر د پخواني مرستیال امرالله صالح له کور نه یې په غټه اندازه ډالر او د سرو زرو خښتې ترلاسه کړي دي.
په یوه ویډیو کې چې ټولنیزو رسنیو ته راوتلې، طالب جنګیالي درې بکسونه ښيي چې له ډالرو ډک دي او ګڼ شمېر د سرو زرو خښتې شماري، او وایي چې دغه شتمني یې د ښاغلي صالح په کور کې کشف کړې ده.
د دغې شتمنۍ دقیقه اندازه نه معلومیږي، خو کافي اندازه ډېره ده چې ښایي ارزښت یې لسګونه میلیونه ډالر وي.
په ویډیو کې لیدل کیږي چې په بکسونو کې د ډالرو لس زریز بنډلونه پراته دي او دوه درې طالبان ورته ناست دي او پیسې او طلا سره لر او بر کوي.
تېره اونۍ هم، طالبانو په پنجشېر کې چې د پخوانۍ شمال ټلوالې پاتې شونو د مقاومت مرکز باله، بې شمېره وسلې او مهمات کشف کړل.
دا لا معلومه نه ده چې صالح دا پیسې د افغانستان له بیت المال نه اېستلې او د کوم هدف لپاره ذخیره کړې وې که یې د نورو اپراتیفي عملیاتو لپاره له کومې بلې سرچینې څخه ترلاسه کړې وې، خو دا وخت چې متحده ایالاتو په نیویارک فدرل ریزرف بانک کې د افغانستان شتمني کنګل کړې، دغه ډول پیسې کولی شي له طالبانو سره ډېره مرسته وکړي.
د ویډیو لېنک: https://www.facebook.com/100011183704694/videos/4383759421739975