تاند(چهارشنبه، د سنبلې ۱۰) د افغانستان شل کلنه جګړه امریکا او متحدانو ته یې په څو تمامه شوه؟
د رسمي شمېرو پر اساس امریکا د ۲۰۰۱ او ۲۰۱۹ کلونو ترمنځ ۸۲۲ ملیارد ډالره د افغانستان په جګړه کې لګولي دي.
په دې پیسو کې هغه نه دي شاملې چې امریکا د افغانستان د عملیاتو په خاطر پاکستان ته ورکړي یا یې هلته لګولي دي.
بریتانیا او جرمني تر امریکا وروسته تر نورو هیوادونو د افغانستان په جګړه کې ډېر مصرف کړی دی ځکه چې د سرتېرو شمېر یې تر نورو هیوادونو ډېر و.
بریتانیا نژدې ۳۰ ملیارد ډالره او جرمني ۱۹ ملیارد ډالره لګولي دي.
دا پیسې له هغو جلا دي چې د افغانستان د ملي امنیتي او دفاعي ځواکونو یا د افغانستان د بیارغونې په چارو لګول شوي دي.
ځینې امریکايي چارواکي وايي، د افغانستان په شل کلنه جګړه کې د امریکا ټول لګښت ۲ تریلیون ډالرو ته رسېږي ځکه چې امریکا د زرګونو ټپیانو او د جګړې له کبله د روحي ناروغانو په درملنه باید ډېر کلونه لګښت وکړي.