تاند(یکشنبه، د سنبلې ۷) د امریکا د متحدو ایالتونو او لویو اروپايي هیوادونو په شمول تر ۹۰ ډېرو هیوادونو وویل چې طالبانو ډاډ ورکړی چې هر هغه چا ته به له هیواده د وتلو اجازه ورکړي چې د سفر اسناد ولري.
دغو هیوادونو په یوه ګډه اعلامیه کې اعلان وکړ چې دوی ته طالبانو ډاډ ورکړی چې درست بهرنیان او هغه افغانان، چې د سفر جواز (ویزه او نور) لري، پرېږدي چې له افغانستانه خوندي ووځي.
د دوی په ګډه اعلامیه کې راغلي«موږ ټول ژمن یوو چې خپل اتباع مو، اقامت لرونکي، کارکوونکي، او هغه افغانان چې زموږ سره یې کار کړی او همداراز هغوی چې په خطر کې دي په ازاد ډول له افغانستانه وتلی او مربوطه هیواد ته تللی شي.»
د هغو هیوادونو په منځ کې چې دا اعلامیه یې لاسلیک کړې ده، استرالیا، کاناډا، فرانسه، جرمني، جاپان، هالنډ، نیوزیلنډ، سویس، اوکراین او بریتانیا شامل دي.
دا ګډه اعلامیه د طالبانو د هغه عمومي اعلان پر اساس خپره شوې چې په هغه کې یې تایید کړه چې د بهر ته تلونکو مخه نه نیسي.
په قطر کې د طالبانو د دفتر غړي او ویندوی سهیل شاهین په یوه ټویټ کې لیکلي:
Those Afghans who are intending to go abroad, they can do so in a dignified manner and peace of mind by having legal documents like passports and visas after resumption of commercial flights in the country.
S.Abas Stanikzai
Deputy Director, Political Office.— Suhail Shaheen. محمد سهیل شاهین (@suhailshaheen1) August 28, 2021
«هغه افغانان چې غواړي بهر ته لاړ شي، په هیواد کې د تجاري الوتنو له پیلېدو وروسته په عزت او ارام ذهن د پاسپورټ او ویزې په شان په قانوني اسنادو تللی شي.»
د طالبانو ویندوی ذبیح الله مجاهد هم نن / یکشنبه انډیا ټوډې ورځپاڼې ته ویلي، طالبان به هغه کسان، چې غواړي له هیواده ووځي د اګست له ۳۱ وروسته هم پرېږدي.
د امریکا او ګڼو نورو هیوادونو اندېښنه وه چې طالبان به داګست له ۳۱ یعني له افغانستانه د امریکايي پوځیانو له وتلو وروسته هغه افغانان پرېنږدي چې بهر ته لاړ شي چې په خپل هیواد کې د خطر احساس کوي.