تاند (یکشنبه، د سنبلې ۷) امریکا وایي له کابل هوايي ډګر څخه یې د خپلو سرتېرو د ویستلو لړۍ هم پيل کړې ده.
د امریکا د دفاع وزارت ویاند جان کربي په یوه خبري کنفرانس کې ویلي، چې امریکا شاوخوا ۵۵۰۰ عسکر د تخلیې د ماموریت لپاره افغانستان ته لېږلي وو چې دمګړی له دې ډلې زر کسه یې بېرته وتلي دي.
کربي زیاتوي د تخلیې ماموریت تر څنګ له کابل هوایي ډګر د امریکايي ځواکونو د ویستلو پروسه هم پيل شوې ده او تر ټاکل شوې نېټې به بشپړه شي.
تر دې وړاندې امریکا د دې غوښتونکې وه چې په کابل کې یې د ځواکونو ماموریت تر یوې مودې تمدید شي خو دا غوښتنه یې د طالبانو له مخالفت سره مخ شوه او ټینګار یې وکړ چې تر ټاکلې نېټې وروسته په افغانستان کې د امریکايي ځواکونو حضور ورته د منلو نه دی.
دا په داسې حال کې ده چې سي ان ان د ولسمشر جو بایډن له قوله خبر ورکړی او ویلي یې دي چې راتلونکو ۲ ورځو کې د کابل هوایي ډګر کې د یو بل ستر تروریستي برید احتمال بیخي ډیر دی.
ټاکل شوې ده راتلونکو دوو ورځو کې چې د روانې اګست ۳۱ کیږي امریکا په افغانستان کې خپل پوځي ماموریت هم پای ته ورسوي.