تاند(چهار شنبه، د سنبلې ۴) د ناټو سرمنشي پرون / سې شنبه له افغانستانه د افغانانو او بهرنیانو د ایستلو لپاره د کابل د نړیوال هوايي ډګر پر اهمیت ټینګار وکړ.
ینس ستولتنبرګ د ۷ سترو صنعتي هیوادونو سرمشریزې ته په انلاین وینا کې وویل«په هوايي ډګر کې د ناټو سلګونه کارکوونکي او قراردادیان د ترافیک د کنټرول، د سونګ موادو د مهیا کولو او ارتباطاتو په شان حساس خدمات وړاندې کوي.
ده تر ممکنه حده پورې په اغېزمن ډول د خلکو په ایستلو کې د ناټو د همږغي د رول پر اړتیا ټینګار وکړ.
«دا مهمه ده چې هغه بریاوې چې افغانانو په تېرو ۲۰ کلونو کې د ټولې نړیوالې ټولنې په مرسته ترلاسه کړي، خوندي پاتې شي.»
ستولتنبرګ د ناټو د لومړیتوب په توګه یادونه وکړه چې افغانستان باید د تروریستانو پر خوندي پناهځای بدل نه شي او له افغانستانه د ناټو پر هیڅ غړي باید تروریستي برید ونه شي.
سرمنشي دا هم وویل چې ناټو به د نړیوال تروریزم پر ضد مبارزې ته دوام ورکړي او دا به یقیني کړي چې افغانستان بیا د ترهګرو پر ځالې بدل نه شي.