تاند (جمعه د اسد ۲۹مه) د امریکا د بهرنیو چارو وزیر انتوني بلینکن د جي ۷ هیوادونو د بهرنیو چارو له وزیرانو سره په افغانستان کې د وروستي وضعیت په هکله خبرې کړي دي.
په دې غونډه کې د کاناډا، فرانسې، جرمني، ایټالیا، جاپان او بریتانیا د بهرنیو چارو وزیرانو او د اروپايي ټولنې استازو برخه درلوده.
د جي ۷ د بهرنیو چارو وزیرانو د ټولو هغو کسانو په خوندي تګ ټینګار وکړ چې غواړي له افغانستان څخه بهر شي.
انتوني بلینکن وايي په دې غونډه کې په افغانستان کې د یوه ټول شموله سیاسي توافق د کېدو په ضرورت چې د ټولو افغانانو اساسي بشري حقونه تامین کړي، ټینګار وشو.
Spoke with the Foreign Ministers of the G7 and @JosepBorrellF to discuss the situation in Afghanistan. We agreed on the need for an inclusive political resolution that protects the fundamental human rights of all Afghans. Many thanks to the G7 and EU for their partnership.
— Secretary Antony Blinken (@SecBlinken) August 19, 2021
دغه راز په دې غونډه کې یادو هیوادونو د بهرنیو چارو وزیرانو ټینګار کړی چې له طالبانو سره به د نړیوالې ټولنې اړیکې د هغوی کړنو پورې اړه ولري، نه د هغوی د خبرو پورې.
د امریکا د بهرنیو چارو وزیر د جي ۷ هېوادونو د بهرنیو چارو وزیرانو او همدارنګه د اروپايي ټولنې استازې د ترهګرۍ پر ضد د مبارزې، بشري هڅو ، کډوالۍ بحث کړی او هوکړه یې کړې چې په ټولو برخو کې نږدې روابط ولري.