تاند ( پنجشنبه د اسد ۲۸ مه) د امریکا د بهرنیو چارو وزارت په افغانستان کې د دغه هېواد له وګړو غوښتی دې چې ژر ترژره له خپلو کورنیو سره ځانونه د کابل هوایي ډګر ته ورسوي.
د امریکا متحده ایالتونو د بهرنیو چارو وزارت په خبرداري کې راغلي دي،چې امریکا متحده ایالتونه د کابل هوایي ډګر ته د تېرېدو امنیت نه شي نیولای.
تر اوسه د کابل په هوایي ډګرکې د ګڼې ګوڼې، بې نظمۍ او د امریکایي ځواکونو له لوري د ډزو له امله دولس تنه وژل شوي دي.
د امریکا متحده ایالتونو ولسمشر پرون له اې بي سي ټلویزیون سره په مرکه کې وویل چې طالبان د کابل هوایي ډګر ته د امریکایي وګړو په خوندي تېرېدو کې همکاري کوي، خو دغه هوایي ډګر ته د دوی د افغان همکارانو په تېرېدو کې له ستونزو سره مخ دي.
کابل ته د طالبانو تر ننوتو وروسته لاهم د کابل په هوایي ډګر کې ګډوډي ده.
دغلته زرګونه کسان لاهم په دې هڅه کې دي چې د بهرنیو الوتکو له لارې له افغانستانه ووځي.
بل خوا د امریکا ولسمشر اعلان کړی دی،چې امکان لري له افغانستانه د بهرنیو ځواکونو د وتلو موده د ټولو هغو افغانانو تر اېستلو پورې وغځوي چې له دغه هېواد سره همکاري کړې ده.
اخوا د کابل د هوایي ډګر یو شمېر ښځينه کارکوونکو ویلي دي چې طالبانو نه دي پرېښي چې خپلو کارونو ته ستنې شي.