اند(سه شنبه، اسد٢٦) – د طالبانو اسلامي امارت وايي، په کابل کې د شريعت غږ راډیو خپرونې يې پيل کړي دي.
په قطر کې طالبانو د مرکچي پلاوي غړى او د دې ډلې د فرهنګي کمېټې مشر امير خان متقي په خپل ټوېټر په کابل کې د شريعت غږ راډیو د خپرونو د پيل خبره کړې ده.
د شريعت غږ راډیو عمومي مسئول مولوي ضیاالحق حقمل ویډیویي پیغام خپور کړى چې هغه په کې خلکو ته د امنیت او ارامۍ ډاډ ورکوي.
هغه وویل: “اوس په ټول هېواد کې حالات د عادي کېدو په لور روان دي او تر اوسه هېڅ د ناامنۍ کومې لویې پیښې نه دي ترسره شوي. اسلامي امارت په مکرر ډول ډاډ ورکړی دی چې د ولس د سر، مال او عزت د ساتنې لپاره پرېکنده ګامونه اخلي.”
د طالبانو اسلامي امارت له دې مخکې ویلي چې د ملي او اسلامي ګټو او ارزښتونو پر بنسټ د بیان ازادۍ اصولو ته ژمن دي.
له دې مخکې دغه راډیو د ملي راډیو په نوم يادېده.
د حامد کرزي په مشرۍ د لنډمهاله ادارې په راتګ سره په 2001 م کال کې د طالبانو د اسلامي امارت په نسکورېدو سره دغه راډیو ‘د افغانستان د ملي راډیو’ په نوم يادېده.
خو طالبانو د ملي تلویزیون د نوم بدلېدو او خپرونو په اړه لا تر اوسه څه نه دي ویلي.
اخوا په کندهار کې د طالبانو اسلامي امارت د يوې اعلاميې په خپرولو سره ټولو رسنیو ته خبر ورکړى چې په آزاده او بې طرفه توګه خپل فعالیتونه پيل کړي او په دې برخه کې د هر راز همکارۍ ته ژمن دي.