تاند (چهارشنبه، اسد ٢٠) – د افغانستان ولسمشر محمد اشرف غني د افغان امنیتي او دفاعي ځواکونو لیکو سره د یوځای کېدو په موخه د هېوادوالو د لېوالتیا قدرداني وکړه او وې ویل، دغه پروسه باید چټکه شي.
د ارګ له لوري په خپره شوې خبرپاڼه کې راغلي، ولسمشر غني دغه سپارښتنه تېر ماښام په ارګ کې د ده په مشرۍ جوړه شوې امنیتي غونډې ته وکړه.
خبرپاڼه کې راغلي، د غونډې په پیل کې د ملي دفاع او کورنیو چارو وزارتونو مسوولینو د وسله وال پوځ لیکو ته د جلب او جذب په اړه معلومات ورکړل.
ورپسې ولسمشر د امنیتي او دفاعي ځواکونو لیکو سره د یوځای کېدو په موخه د افغانانو د لېوالتیا قدرداني وکړه وې ویل: ” دغه پروسه باید چټکه شي.”
سرچینه زیاتوي، دارنګه د امنیتي او دفاعي ځواکونو مسوولینو ته لارښوونه وشوه چې د ځواکونو د اکمالاتو او تجهیز په اړه عاجل اقدامات وکړي.
ولسمشر داسې مهال د افغان ځواکونو په ليکو کې د جلب او جذب د چټکتيا سپارښتنه وشوه چې د طالبانو په لاس د فراه ښار هم سقوط شو.
بل لورته تېر ماښام د عبدالرشيد دوستم په ملتيا لسګونه وسله وال د طالبانو پر ضد د جګړې لپاره بلخ ته رسېدلي دي.
په همدې حال کې په بلخ کې د افغان امنیتي ځواکونو او وسله والو طالبانو ترمنځ د سختو جګړو په دوام عطا محمد نور وايي، تېره شپه يې د يو شمېر سياسي ګوندونو له استازو سره يې غونډه کړې ده.
هغه په خپل فېسبوک پاڼه ويلي، په دې غونډه کې د شته چمتووالي، د ریزرف قطعاتو رامنځته کولو، د جګړې لومړي خط پیاوړتیا، د پاکسازۍ برنامو او د ګوريلايي جګړو په اړه بحث وشو.
نوموړي زیاته کړه، همدارنګه په دغه ناسته کې د ضعفونو، ستونزو او اړتیاوو، د مخابرې له لارې د اړیکو تینګښت او د جګړې د راتلونکې لپاره د محرم ګامونو او چمتووالی په موخه هر اړخیز بحثونه وشول.