تاند(سهشنبه، اسد١٩) – د افغانستان په شمال کې د وسله والو طالبانو او افغان ځواکونو ترمنځ د سختو جګړو په دوام او د جوزجان، سرپل او سمنګان له سقوط وروسته تازه د شاهین قول اردو قوماندان تبدیل شو.
ملي دفاع وزارت او د بلخ سيمه ييز چارواکو ویلي، چې تورن جنرال ذبیح الله مهمند د جنرال خان الله شجاعي پر ځای د ۲۰۹ شاهین قول اردو د نوي قوماندان په توګه ټاکل شوی دی.
ويل کېږي ښاغلي شجاعي تېره ورځ ملي دفاع وزارت ته خبر ورکړى و چې د ناروغۍ له امله کابل ته ځي او خپل مرستیال يې سرپرست په توګه معرفي کړى و.
د بلخ چارواکو د نوي قومندان په راتلو هيله څرګنده کړه چې د وسله والو طالبانو پر ضد به يې پلانونه ګټور ثابت شي.
د نوي قومندان په ورتګ سره ياد قولاردو د يوې خبرپاڼې په خپرولو سره ویلي، تېره شپه یې په بلخ ولایت ۸۰ طالب وسله وال وژلي دي.
په ورته مهال د ملي دفاع وزارت وايي، په تېرو ٢٤ ساعتونو کې د دفاعي او امنيتي ځواکونو سره متقابلو بریدونو او نښتو کې ۳۶۱ طالبان وژل شوي او ۱۴۵ نور ټپيان دي.
دغه وزارت د خپرې شوې خبرپاڼې له مخې، دغه طالبان د ننګرهار، کونړ، لوګر، پکتیا، پکتیکا، میدان وردګ، کندهار، سرپل، هلمند، تخار، کندوز او بغلان ولایتونو کې وژل شوي او ټپیان دي.
خبرپاڼه زياتوي، د دغو پېښو په نتیجه کې یوه زیاته اندازه وسلې او مهمات هم له منځه وړل شوي.
بل پلو راپورونه وايي، چې له تېرې شپې راهیسې د فراه ښار په څلورو برخو کې د افغان امنیتي ځواکونو او وسله والو طالبانو ترمنځ سخته جګړه روانه ده.
د دغو جګړو له امله په فراه ښار کې دکانونه تړل شوي او خلک په خپلو کورونو کې بند پاتې دي.
وسله والو طالبانو تېره شپه د باغپل، چهارباغ، ريګي او دهک له څلورو سيمو پر فراه ښار بريدونه پيل کړي چې دواړو لورو ته مرګ ژوبلې د اوښتو راپور نه دى ورکړل شوى.
داراز د بدخشان چارواکي وايي، بر فيض اباد ښار د وسله والو طالبانو درېيمه حمله يې د افغان ځواکونو او ولسي پاڅون کوونکو په ملاتړ له ماتې سره مخ کړې ده.
د بدخشان د امنیه قوماندانۍ وياند ثناالله روحاني وویل، طالبانو تېره شپه له شپږو لوريو پر فيض اباد ښار بريدونو پيل کړل چې درانه تلفات يې ورواړول.
همدارنګه د افغانستان سويل ارزګان کې چارواکو د ١٣ طالبانو د وژل کېدو خبر ورکړ.
د دې ولایت امنیه قوماندانۍ ویاند مغفور الله سالار وویل، دغه طالبان تېره شپه په مرکز ترینکوټ اړوند نچين او خانقه سيمو کې د افغان امنیتي ځواکونو سره په مخامخ جګړه کې وژل شوي دي.