تاند(دوشنبه، اسد١٨) – د افغانستان د ملي دفاع وزارت وايي، دفاعي او امنيتي ځواکونو سره متقابل بریدونو او نښتو کې ۵۷۹ طالبان ووژل شول او ۱۶۱ نور ټپيان شول.

دفاع وزارت د يوې خبرپاڼې په خپرولو سره ویلي، دغه طالبان د ننګرهار، خوست، لوګر، پکتیا، کندهار، هرات، فراه، جوزجان، سمنګان، هلمند، تخار، کندز او پنجشیر ولایتونو کې وژل شوي او ټپيان دي.

خبرپاڼه زياتوي، د دغو پېښو پر مهال یوه زیاته اندازه وسلې او مهمات هم له منځه وړل شوي.

خو په ورته وخت کې د کندز ښار يو شمېر اوسېدونکي وايي، چې په ښار کې ځاى ځاى هټۍ خلاص شوي او خلک تګ راتګ کوي.

دغه اوسېدونکي زياتوي، د تېرې شپې راهیسې په دننه ښار کې نښتې نه دي شوي خو د ښار په سويل لورته د ډزو غږونه اورېدل شوي دي.

ياده دې وي، چې وسله والو طالبانو تېره ورځ د کندز ښار په بشپړ ډول ونيوه او امنیتي ځواکونه په هوايي ډګر او پامير ۲۰۱۷ قول اردو کې راغونډ شوي دي.

د کمانډو ځواکونو مسؤلینو ويلي، تېره ورځ يې په دې ښار کې وسله والو طالبانو ته درنه مرګ ژوبله اړولې او تصفیوي عملیات يې دوام لري.

بل خوا د بغلان او بدخشان ولايتونو چارواکي وايي، د وسله والو طالبانو بريدونه يې په شا تمبولي دي.