تاند ( یکشنبه، د اسد ۱۷) د کندهار ، هلمند او ننګرهار ولایتونو امنیتي چارواکي وایي، چې په تېرو ۲۴ ساعتونو کې افغان ځواکونو د هوایي بریدونو پرمهال ۲۱۳ وسله والو طالبانو ته مرګ ژوبله اړولې ده.
کندهار کې د ۲۰۵ اتل قول اردو د مطبوعاتي دفتر مرستیال جګړن صادق عیسی وایي، په تېرو ۲۴ ساعتونو کې د کندهار ښار پر امنیتي کمربندونو او دغه راز ډنډ او ژړۍ ولسوالیو کې د افغان ځواکونو په هوايي بریدونو کې ۴۷ طالبان وژل شوي او ۲۶ نور ټپیان دي.
په ورته وخت کې د کندهار میرویس روغتون مسوولان وایي، چې ته په تیرو ۲۴ ساعتونو کې د کندهار ښار د جګړو له بیلا بیلو سیمو دوی ته دوه مړي او ۲۶ ټپیان ور وړل شوي چې ۱۸ یې په مرمۍ او ۸ يې د هوان د لګیدو په پیښه کې ټپیان شوي دي.
د یاد روغتون مسوول محمد داود فرهاد رسنیو ته ویلي، چې له دې جملې ۱۶ یې ملکیان دي.
بل لورته بیا د هلمند امنیتي چارواکې هم په تیرو ۲۴ ساعتونو کې د ۵۴ وسله والو طالبانو د وژل کېدو او ۲۳ نورو د ټپي کیدو خبر ورکوي.
د ۲۱۵ میوند قول اردو ویاند جګړن عبدالقدیر بهادرزی وایي، دا عملیات هوايي او ځمکنیو ځواکونو ترسره کړي.
د یوه بل خبر له مخې د ننګرهار امنیتي چارواکي بیا وایي، په شېرزادو ولسوالۍ کې د تېرو ۲۴ ساعتونو پرمهال افغان ځواکونو۶۳ طالبانو ته مرګ ژوبله اړولې ده.
د والي ویاند عطاالله خوګیاڼی وایي دا عملیات د یادې ولسوالۍ په چهارچنار، کنډۍ، ساخۍ، هاشم خېلو او یو شمېر نورو سیمو کې د هوایي ځواک په ملتیا ترسره شوي دي.
نوموړی وایي په دې بریدونو کې د وسله والو طالبانو مرکزونه، وسلې او مهمات هم له منځه وړل شوي دي.
وسله والو طالبانو د افغان چارواکو د یادو ادعاوو په اړه غبرګون نه دی ښودلی.
دا په داسې حال کې ده، چې نن د دوهمي ورځې لپاره هم په کندهار کې د احمد شاه بابا پر هوايي ډګر د راکټي بریدونو له امله دغه ولایت ته ټول ملکي پروازونه ځنډیدلي دي.
د یاد هوایي ډګر مسوول مسعود پښتون وایي نن سهار هم دوه د راکټ مرمۍ پر هوایي ډګر ولګېدې خو مالي او ځاني زیان نه لري.
دوی هیله ښودلې، چې ژر به هوایي پروازونه عادي حالت ته راوګرځي.