تاند (یکشنبه د اسد ۱۷) وروستي راپورونه وایي چې وسله والو طالبانو د تخار ولایت مرکز تالقان په بشپړه توګه لاندې کړ.
د سیمه ییزو سرچینو او ولسي خلکو په خبره وسله والو طالبانو د دغه ولایت د زندان تر نیولو وروسته د ولایت مقام په یو شمېر برخو، امنیه قومندانۍ او د ملي امنیت ریاست په ودانۍ بریدونه پیل کړي او ټولې دولتي ادارې یې نیولي دي.
ویل کېږي سیمه ییزو چارواکو او نظامیانو د دغه ولایت فرخار ولسوالۍ ته پناه وړې ده.
په تالقان ښار کې له تېرې شپې راهیسې د افغان ځواکونو او طالبانو تر منځ سختې نښتې روانې دي.
د راپورونو له مخې وسله وال طالبان له شدیدې جګړې وروسته د تخار زندان ته مات کړی او هڅه کوي چې بندیان خوشې کړي.
امنیتي چارواکو او طالبانو تر اوسه په دې هکله څه نه دي ویلي.