تاند (چهارشنبه، اسد١٣) – د ولسمشرۍ ماڼۍ دوهم مرستیال امرالله صالح وايي، طالبان له سياسي او اخلاقي ماتې وروسته د دې ډلې نظامي ماته هم حتمي ده.
ښاغلي صالح پر خپل فېسبوک پاڼه ليکلي: د طالب له ظلم او وحشت څخه د زرګونه باعزته کندهاريانو کورنیو تېښته کړې. د ناپوهۍ لښکر باطله او جعلي ادعا لري چې د کليوالو ملاتړ له ځانه سره لري. دغه باعزته کليوال ولې کډه شوي. طالب له سياسي او اخلاقي نظره ناوړه ماتې خوړلې او نظامي ماته يې هم حتمي ده.”
د ولسمشر مرستیال وروسته له هغې يادې څرګندونې وکړې چې چارواکي وايي، د کندهار ښار په ناحیو او ولسوالیو کې د جګړو له کبله په تېرو درېیو اونیو کې شااوخوا دوه ویشت زره کورنۍ د خپلو مېنو پرېښودو ته اړې شوې دي.
د کندهار د کډوالو او راستنېدونکو چارو رییس دوست محمدنایاب ويلي، د دې کډوالو یوه برخه چې ډېری ښځې او ماشومان دي په دولتي ودانیو کې ځای پرځای شوې دي.
نایاب وویل: “نژدې دوه ویشت زره کورنۍ د کندهار ښار له اوو ناحیو او هغو ولسوالیو څخه چې جګړې په کې روانې دي، د کندهار امن سیمو ته را بې ځایه شوي. موږ تقریباً نهه نیم زره کسان په دولتي تاسیساتو کې ځای پرځای کړي دي چې اکثریت ماشومان او ښځې دي.”
د کندهار په پنځمه، نهمه، دیارلسمه او پنځلسمه ناحیه کې له تېرو څو ورځو راهیسې د طالبانو او دولتي ځواکونو ترمنځ سختې جګړې روانې دي چې له کبله یې زرګونه کورنۍ د خپلو کورونو پرېښودو ته مجبوره شوې دي.