تاند (سه شنبه د اسد ۵) هند وايي د افغانستان په اړه له امریکا سره جدي خبرې کوي.
د هند د بهرنیو چارو وزیر جي شینکر ویلي چې سبا چهارشنبه له خپل امریکایي سیال سره په نوي ډهلي کې ګوري او په دې لیدنه کې به پر مهمو مسایلو خبرې کېږي.
دده په وینا افغانستان ددې لیدنې د بحث مهمه موضوع ده او هند هڅه کوي په جدي توګه د افغانستان په هکله له امریکا سره خبرې وکړي.
تر دې وړاندې هند ویلي و چې په افغانستان کې روانه جګړه بوږنوونکې ده او نړیوالو ته په کار ده چې ددغې جګړې په ختمولو کې خپلې همکارۍ ډېرې کړي.
امریکايي رسنۍ هم وایي چې جنوبي اسیا او افغانستان د هند او امریکا د لوړپوړو چارواکو ترمنځ د بحث مهم موضوعات دي.