تاند (یکشنبه د اسد ۳) په فرهنګي چارو کې د ولسمشر اشرف غني سلاکار شاه حسین مرتضوي افغان پولې ته څېرمه د ځینو ګاونډیو هېوادونو د ځواکونو ځای پر ځای کولو ته غبرګون ښودلی دی.
شاه حسین مرتضوي دا څرګندونې وروسته له هغې کوي چې په دې وروستیو کې افغانستان کې د جګړې د زیاتېدو سره سم پاکستان ډېورنډ فرضي کرښې ته څېرمه او ایران، تاجکستان او ازبکستان د افغانستان پولو ته څېرمه ځواکونه ځای پر ځای کړي دي.
د افغان ولسمشر د فرهنګي چارو سلاکار پر دغو ګاونډیانو غږ کړی چې پولې ته د سرتېرو او ځواکونو د لېږلو پر ځای دې له طالبانو خپل ملاتړ پرېکړي.
نوموړي د کوم هېواد د نوم له اخیستو پرته پر خپل ټویټر لیکلي چې ګاونډي هېوادونو له ترهګرۍ څخه د وېرې په خاطر د افغانستان پولو ته نږدې خپل ځواکونه ځای پر ځای کړي دي.
کشورهای همسایه از ترس تروریستان در نوار مرزی های افغانستان لشکرکشی دارند. بهتر بود در قدم نخست مانع حضور شهروندان خود برای عضویت در گروه های تروریستی می شدند. در گام بعدی همه درک کنند که مادر تروریزم طالبان اند. امنیت منطقه و جهان از سوی طالبان در معرض تهدید است.
— shahussain murtazawi (@Murtazawi3) July 25, 2021
شاه حسین مرتضوي ویلي، دغو هېوادونو باید پولو ته د ځواکونو د ځای پر ځای کولو څخه مخکې په ترهګرو ډلو کې د خپل هېواد د وګړو د غړیتوب مخینوی کړی وی.
مرتضوي زیاته کړې، «په دویم قدم کې باید ډول درک کړي چې ترهګرۍ مور طالبان دي، د سیمې او نړۍ امنیت د طالبانو له لوري له خطر سره مخامخ دی.»
افغان چارواکو په وار وار پاکستان، ایران او روسیه عملآ د طالبانو په ملاتړ تورن کړي او وايي چې دغه هېوادونه د ټولو نړیوالو قوانینو خلاف طالبانو ته روزنیز، تجهیزاتي او نور جنګي امکانات برابروي.