تاند (سه شنبه د سرطان ۲۲) د ملی پخلاینې عالي شورا غړې او د خوست ولایت د ولایتي شورا وکیله، زهرا جلال له خپلو کسانو سره د طالبانو له بند څخه را ازاده شوه.
د هغې زوی یوسف جلال پر خپله فیسبوک پاڼه لیکلي چې مور یې له خپلو ورونو او موټر چلوونکي سره د قومي سپین ږیرو په منځګړیتوب د طالبانو له بند څخه راخلاصه کړې ده.
وکیله زهرا جلال نن له غرمې مخکې د لوګر ولایت د سیدحبیب الله کلا په سیمه کې له خپلو زامنو سره د طالبانو له لوري تښتول شوې او نامعلوم لوري ته وړل شوې وه.
طالب ویاند ذبیح الله مجاهد هم رسنیو ته په استولي غږیز پېغام کې د هغې د خوشې کولو خبره کړې ده.
میرمن جلال په خپل شخصي موټر کې له کابل څخه خوست ولایت ته پر لاره وه.