تاند(یکشنبه، د سرطان ۲۰) افغان حکومت د اروپایي هېوادونو نه غوښتنه کړې، چې د راتلونکو دریو میاشتو لپاره دې د افغان کډوالو اجباري ایستل بند کړي.
افغان حکومت داسې مهال د دې اقدام غوښتنه کړې، چې په افغانستان کې جګړو زور اخیستی او ناامني زیاته شوې.
د افغانستان د کډوالو او بیرته راستنیدونکو چارو وزارت په یوې اعلامیې کې ویلي چې له یوې خوا د طالبانو د تشدد ډیروالي او له بلې خوا د کورونا ناروغۍ خلکو ته اقتصادي او ټولنیزې ستونزې پیدا کړي دي.
په اعلامیې کې راغلي،” د حکومت په پرېکړې کې ټینګار شوی چې کوربه هېوادونه دې د افغان کډوالو اجباري ایستل د دریو میاشتو لپاره بند کړي”.
یاد وزارت همدا راز زیاته کړې، چې د اروپا نه د افغان کډوالو راستنېدل د اندېښنې وړ دي.
د مهاجرینو لپاره د ملګرو ملتونو د ادارې د معلوماتو له مخې په ۲۰۱۸ کال کې شاوخوا ۲.۵ میلیونه ثبت شويو افغانانو د هېواد نه بهر د کډوالۍ ژوند کاوه، چې په نړۍ کې دویم هېواد دی چې دومره ډیر وګړي یې کډوال دي.
اکثریت دا افغان کډوال په پاکستان، ایران او اروپایي هیوادونو کې ژوند کوي.
د اروپایي ټولنې د احصایې ادارې د معلوماتو له مخې تیر کال شاوخوا ۴۴۱۹۰ افغانانو په اروپایي هېوادونو کې د لومړي ځل لپاره د پناه غوښتنه کړې وه.