تاند (چهارشنبه د سرطان ۹) د افغانستان د ملي دفاع وزارت وایي چې تازه دمې کومانډو ځواکونه غزني ولایت کې ځای پر ځای شوي دي او ډېر ژر به چاڼیز عملیات پیل کړي.
د چارواکو په خبره چې په دې عملیاتو کې افغان هوايي ځواک هم د کومانډویانو ملاتړ کوي او ډېر ژر به وضعیت عادي حالت ته راوګرځول شي.
دفاع وزارت وروسته تر هغه کومانډو ځواکونه غزني ته لېږلي چې په دې وروستیو کې د دغه ولایت د امنیتي وضعیت په اړه اندېښمنونکي راپورونه ورکړل شول او داسې اندېښنې وې چې ګواکې دا ولایت به یو ځل بیا د طالبانو لاس ته ولوېږي.
په ولسي جرګه کې د غزني د خلکو استازو تېره ورځ په مرکزي حکومت غږ وکړ چې جګړه د غزني ښار څنډو ته رسېدلې او که پوځي عملیات پیل نه شي ښايي دغه ولایت سقوط وکړي.