تاند ( یک شنبه، د سرطان ۶) کابل کې د پاکستان سفارت ویلي، چې د جولای میاشتې په اوږدو کې به تورخم دروازه یوازې د محصلینو پر مخ خلاصه وي.
د پاکستان سفارت زیاته کړې، دا دروازه به د هغو محصلینو پر مخ پرانیستې وي، چې په پاکستان کې پر زده کړو بوخت دي او د دروازې د تړل کېدو له امله یې درسونه له خنډ سره مخ شوي دي.
د سرچینې په حواله دغه دروازه به د جولای میاشتې په ۳مه او ۴مه نېټه پرانیستې وي.
کابل کې د پاکستان سفارت وایي، په یادو ورځو کې محصلینو سره د تګ پرمهال د کورونا ټېسټ اړین دی او پایله یې باید منفي وي.
پاکستان د کورونا وبا د درېیمې څپې په پلمه له څو اونیو راهیسې د تورخم دروازه د هر ډول تګ راتګ پر مخ تړلې ده.
اوس یواځې ناروغان له یادې دروازې پاکستان ته د درملنې په موخه پرېښودل کېږي.
بل لورته بیا هغه افغان محصلین چې په پاکستان کې په زده کړو بوخت دي وایي، د دروازې د بندېدو له امله یې درسونه له خنډ او ځنډ سره مخ دي او آن له ډېرو محصلینو ازموینې هم تېرې شوې دي.
دوی هیله لري، چې ژر به د دوی د زده کړو پر وړاندې شته ستونزې حل شي.
افغان دولت باید دا زده کوونکي پاکستان ته پرینږدي، ځکه دوی ورته د ترهګرۍ درسونه ورکوي، او د تروریزم له پدیدې سره یې اشنا کوي، ښه به دا وي چې افغانان بشرپاله او سوله خوښوونکو هیوادونو ته د زده کړو لپاره واستوي.
موږ نه غواړو چې سبا له د دغه زده کوونکو نه یو بل ګلبودین حکمتیار، یو بل رباني یو بل مسعود او یا نور ترهګر جوړ شي.
دا د ټول ملت یوه حساسه او په ځای غوښتنه ده.