تاند (دوشنبه د جوزا ۳۱) د افغانستان د ملي دفاع وزارت وايي، افغان ځواکونو د تخار ولایت بنګي او خواجه غار ولسوالۍ بېرته له وسله والو طالبانو څخه ونیولې.
د دفاع وزارت نن دوشنبه په یوه خبرپاڼه کې ویلي چې افغان ځواکونو د یادو ولسوالیو د تصفیې لپاره هوايي او ځمکني عملیات پيل کړي و.
په خبرپاڼه کې راغلي، د بنګي او خواجه غار ولسوالیو د بیرته نیولو پر مهال وسله والو طالبانو ته درنه مرګ ژوبله اوښتې ده او له یادو ولسوالیو په شاه کړل شول، دغه راز د دې عملیاتو پرمهال د وسله والو طالبانو ګڼ شمېر سپکې او درندې وسلې هم د افغان ځواکونو لاسته ورغلي دي.
د تخار ولایت بنګي او خواجه غار ولسوالۍ په دې وروستیو کې تر پراخو بریدونو وروسته د طالبانو لاسته لوېدلې وې او افغان ځواکونو د ولسوالیو له مرکزونو څخه تکتیکي شاتګ کړی و.
د ملي دفاع وزارت وايي چې د دغو ولسوالیو په بیرته نیولو کې د سیمې ولسي پاڅونوالو هم د افغان ګډو ځواکونو سره مرسته کړې.
بلې خوا بیا وسله والو طالبانو نن په بلخ ولایت کې د شولګرې او دولت اباد او د بغلان ولایت دوشي او جلګې ولسوالیو مرکزونو د نیولو ادعا کړې ده.
ویل کیږي جګړه د تخار مرکز تالقان ښار څنډو ته رسېدلې ده. خو دفاع وزارت وايي چې د مرکز تالقان اړوند ابدال او قره پرچو سیمو کې طالبانو ته مرګ ژوبله اړولې ده او یو شمېر کلي تصفیه شوي هم دي.
د ملي دفاع وزارت وايي چې د تخار پر مرکز د طالبانو د بریدونو دفع کولو په هدف دغه ولایت ته کمانډو ځواکونه رسېدلي دي.
طالبانو تر دا مهاله په دې هکله څه نه دي ویلي.