تاند ( یک شنبه، د جوزا ۳۰ ) د ننګرهار ولایت سوداګر په دې ولایت کې د پولیسو له ناسم چلند نه شکایتونه لري.
د دې ولایت د صنایعو او معدن خونې رئیس حاجي تورملنګ او ننګرهار کې د ښځينه سوداګرو د خونې مشرې پلاتون بيدار وايي، تورخم ته د سبزيجاتو او ميوو د لېږد پرمهال د پولیسو له تالاشۍ نور تنګ دي.
دوی وایي: « کومې لارۍ، چې تر تورخم پورې ځي نو پنځه ځايه تالاشي او توکي په سيخ وهل کېږي، چې بيا په نورو بازارونو کې د سيالۍ وړ نه وي او خپل نرخ نه کوي.»
دوی له اړونده ادارو غوښتنه وکړه، چې دوی ته د سوداګرۍ په برخه کې اسانتیاوې برابرې کړي.
ننګرهار مېشتو سوداګرو دا شکایتونه نن په دې ولایت کې د صادراتي اموالو اړوند د اسنادو د طی مراحلو لپاره د جوړ شوي مرکز د پرانیستې په مراسمو کې وکړې.
مسوولان وایي په دې مرکز شاوخوا ۱۲ ملیونه افغانۍ لګښت راغلی او په جوړېدو سره به یې د سوداګرو ستونزې تر ډېره حل شي.
په ورته وخت کې بیا د سوداګرۍ وزارت مرستيال سليمان بنشاء د دې ولایت پانګوالو او سوداګرو ته ډاډ ورکړ، چې ستونزې به یې په مرکز کې اړونده ادارو ته د حل په موخه وړاندې کړي څو حل لار ورته وګوري.