تاند ( دوشنبه، د جوزا ۲۴ مه) ترکیه وایي د بهرنیو ځواکونو تر وتلو وروسته په افغانستان کې د مسوولیت اخیستلو ته تیاره ده.
د دغه هېواد ولسمشر رجب طیب اردوغان ویلي چې دوی چمتو دي په افغانستان کې مسوولیت واخلي او په بریالي ډول یې ترسره کړي.
اردوغان بروکسل ته تر تګ مخکې په انقره کې خبریالانو ته ویلي د بهرنیو ځواکونو تر وتلو وروسته یواځینی باوري هېواد چې کولی شي د کابل هوایي ډګر وساتي او دغه ماموریت په بریالۍ توګه ترسره کړي هغه ترکیه دی.
دده په وینا امریکایي چارواکو ورسره خبرې کړې دي او ترکیه تیاره ده چې دغه ماموریت ومني.
اردوغان دا هم وايي چې پر دې مسئله به په بروکسل کې له جو بایډن سره هم خبرې وکړي.
ترکیه داسې مهال دغه څرګندونې کوي چې د حامد کرزي نړیوال هوایي ډګر د امنیت په اړه اندېښنې پیدا شوې دي، خو ناټو یې یوه غړي هېواد ته د امنیت د سپارلو خبره کړې ده.
د دې ترڅنګ بیا وسلوالو طالبانو ویلي چې د هېڅ هېواد نظامي حضور نه مني.