تاند (شنبه د جوزا ۲۲) د چین اووه سوه زره ډوزه کورونا ضد واکسین او د پنځه میلیونه ډالرو په ارزښت مرسته شوي نور طبي توکي کابل ته را رسېدلي.
د افغانستان ولسمشرۍ ماڼۍ وايي چې ولسمشر اشرف غني نن په چهار چنار ماڼۍ کې په همدې تړاو جوړې شوې غونډې ته په خبرو کې وویل چې واکسین د ژوند ډالۍ ده او د همدې مرستې په خاطر له چین څخه مننه او قدردانی کوي.
ښاغلي غني زیاته کړه، د کورونا د تېرو دوو څپو په پرتله د هېواد په روغتیایي سکتور کې پام وړ ښه والی راغلی دی.
د ارګ د خبرپاڼې له مخې ولسمشر د کابل والي ته سپارښتنه وکړه چې خصوصي سکتور دې لا ډېر له کورونا سره د مبارزې برخه کې دخیل کړي.
په خبرپاڼه کې دغه راز راغلي چې د چین سفیر وانګ یو هم له کورونا سره د مبارزې او تلپاتې سولې ته د رسېدو برخه کې د افغانستان پر بشپړ ملاتړ ټینګار وکړ.
د یادونې ده چې چین تازه له افغانستان سره د نورو طبي توکو مرسته هم کړې ده.
په چین کې د افغانستان سفیر جاوېد قایم وایي، په دې مرسته کې پنځلس قلمه طبي توکي لکه، وېنټیلاټور، مونیټور، د زړه ماشینونه او داسې نور وسایل شامل دي. دی وایي، له دغه وسایلو څخه به د عاجلو ناروغانو د درمنلې لپاره کار اخیستل کېږي.
دغه طبي توکي په چین کې د افغانستان سفارت او په کابل کې د چین سفارت په همغږۍ تېره شپه د آریانا افغان هوایي شرکت له خوا کابل هوایي ډګر ته را رسېدلي دي.