تاند ( شنبه، د جوزا ۲۲) د ملګرو ملتونو امنیت شورا په افغانستان کې د تاوتریخوالي پر ډېرېدو او د ملکي وګړو د مرګ ژوبلې پر زیاتېدو اندېښنه ښودلې.
یادې شورا په یوه خبرپاڼه کې په بغلان کې د ماین پاکۍ د یوې موسسې پر کارکوونکو برید هم په کلکو ټکو غندلی او زیاته کړې يې ده، چې د هغو کسانو په نښه کول ستر بشري جنایت دی چې بشردوستانه خدمات ترسره کوي.
د ملګرو ملتونو امنیت شورا ویلي، دوی د نړۍ په ګوټ ګوټ کې د ترهګریزو کړنو مخالف دي او ټولې هغه کړنې غندي، چې پکي بې ګناه او ملکي وګړي وژل کېږي.
خبرپاڼه کې له افغان حکومت غوښتل شوي، چې د دغه ډول بریدونو په اړه ژر تر ژره پلټنې وکړي.
د ملګرو ملتونو امنیت شورا په خبرپاڼه کې دغه راز په دې ټینګار شوی چې د دا ډول پېښو سرچینې او ملاتړي یې پیدا او د قانون منګولو ته دې وسپارل شي.
د ملګرو ملتونو امنیت شورا داسې مهال دا اندېښنه ښيي، چې په دې وروستیو کې په افغانستان کې جګړه سخته تېزه شوي او هره ورځ دملکي وګړو د مرګ ژوبلې راپورونه خپرېږي.