تاند (شنبه ، د جوزا ۲۲) د لوګر ولایت یوشمېر خبریالانو او رسنیزو بنسټونو د جمعې به ورځ په یوه ناسته کې د سیمه ییز خبریال حفیظ الله حق پرست وژل کېدل وغندل او له ښکیلو لوریو يې وغوښتل چې یاده پېښه په جدي ډول وڅېړي.
حفیظ الله حقپرست د جون په ۹مه د لوګر مرکز اړوند د کلنګار په عرب خان کلا سیمه کې د وسله والو طالبانو او افغان ځواکونو ترمنځ په جګړه کې هغه مهال ووژل شو، چې نوموړي خپله کرونده کې کار کاوه.
خبریالانو او د رسنیو استازو وايي، د دا ډول پېښو زیاتېدل افغان خبریالان له سختو اندېښنو سره مخ کړي او حکومت یې باید په مخنیوي کې کوټلي ګامونه پورته کړي.
خپلواک خبریال شفیع الله افغانزي د دې ناستې پرمهال د حفیظ الله حقپرست د وژنې د عاملینو د موندلو او ورته د سزا غوښتنه وکړه.
افغانزی وايي، خبریالانو تل هڅه کوي له واقعیتونو پرده پورته کړي، نو دوی باید په نښه نشي او د ژوند او خوندیتوب ته يې پاملرنه وشي.
د دې اعتراضیه ناستې په پای کې د لوګر د خپلواکو خبریالانو د ټولنې مشر نورالله ستانکزي د غونډې ۵ ماده ییزه اعلامیه هم ولوسته.
د دې اعلامیې په یوه برخه کې لیکلي وو: « د حفیظ الله حقپرست د شهادت پېښه دې د جګړې ښکېل اړخونه په جدي او هر اړخیزه توګه وڅېړي، قاتل دې پیدا او د قانون منګولو ته وسپارل شي، ژورنالیستان او خپلواکې رسنۍ ملکي اهداف دي؛ د جګړې له دواړو لورو غوښتنه کوو، چې د دوی خوندیتوب او مصئونیت برخې ته جدي پاملرنه وکړي، د ژورنالیستانو له ملاتړو ټولنو، افغان دولت او نورو اړوندو بنسټونو څخه غوښتنه کوو ترڅو د شهید حقپرست له کورنۍ سره مرستې وکړي.
تر اوسه هېڅ یوې ډلې د حقپرست د مړینې مسوولیت نه دی منلی.
په ورته وخت کې د لوګر د ولایتي شورا رئیس حسیب الله ستانکزي بیا د جګړې پر ښکېلو لوریو غږ وکړ، چې د ملکیانو خوندیتوب ته پام وکړي.
نوموړی وايي، افغان حکومت او طالبان دې په هغو سیمو کې چې عام ولس اوسي او دوی ته د تلفاتو د اوښتو وېره وي له جګړې ډډه وکړي.