تاند (پنجشنبه د جوزا ۲۰) افغان ځواکونو په لغمان ولایت کې د طالبانو مشهور قومندان بدرالدین له خپلو درې نورو ملګرو سره په مخامخ جګړه کې وژلی دی.
د یاد ولایت له امنیه قومنداني څخه په خپره شوې خبرپاڼه کې ویل شوي چې نوموړی لغمان ولایت لپاره د طالبانو د نظامي چارو مرستیال و چې نن ماښام د الینګار ولسوالي په استقامت د دادو کلا په سیمه کې له خپلو ملګرو سره ووژل شو.
په خپرو شوو مالوماتو کې ویل شوي، نوموړی د افغان ځواکونو په موخیزو عملیاتو کې وژل شوی چې څو نور ملګري یې ټپیان شوي هم دي.
سرچینې خپل لور ته د مرګ ژوبلې اوښتو په اړه څه نه دي ویلي.
لغمان کې تېره ورځ هم په درې جلا ـ جلا نښتو کې ۲۰ طالبانو ته مرګ ژوبله اوښتې وه.
طالبانو تر اوسه په دې اړه رسنیو ته څه نه دي ویلي.