تاند ( یک شنبه د جوزا ۱۶) نن له غرمې وروسته د پکتیا په مرکز ګردیز کې د ملکي کسانو پر موټر چاودنه شوې چې څلور کسان په کې وژل شوي دي.
د پکتیا والي محمد حلیم فدایي رسنیو ته ویلي، چې چاودنه د ګردیز ښار اړوند په ابراهیم خیلو کې پر هغه موټر شوې، چې ملکي کسان یې د خپلو دوستانو د واده مراسمو ته لیږدول.
فدایي ویلي، په یاده پېښه کې دوه میرمنې، یو دولس کلن ماشوم او د موټر چلوونکی وژل شوي دي.
د چاودنې مسؤولیت تر اوسه کومې مخالفې وسله والې ډلې په غاړه نه دی اخیستی.
دا لومړی ځل نه دی، چې د ملکي کسانو پر موټړو د سرک غاړې او نښلېدونکي ماینونه چاودنې کوي، بلکې له دې وړاندې یې هم د زرګونه بې ګناه هېوادوالو ژوند اخیستی او ګڼ شمېر نور یې ټپیان کړي دي.