تاند – د افغانستان د بهرنیو چارو وزیر په سیمې او ګاونډیو هېوادونو کې د افغانستان له سفیرانو، جنرال قونسلانو او د بهرنیو چارو وزارت د سیاسي څانګو له رئیسانو سره د عاجل روغتيايي مرستو د جلبولو لپاره خبرې وکړې.
د بهرنیو چارو وزارت په افغانستان کې د کورونا ویروس زیاتېدو ته په اشارې سره وايي چې ګاونډي او د سیمې هېوادونه باید په دې پړاو کې خپلې مرستې او ملاتړ ونه سپموي.
افغانستان داسې مهال له کورونا څخه د مخنیوي په خاطر د مرستو د جلبولو خبره کوي چې د روغتیايي چارواکو په وینا د کورونا درېیمه څپه مخ په زیاتېدو ده.
د بهرنیو چارو وزارت په یوه بیان کې راغلي چې ښاغلي اتمر په سیمې او ګاونډیو هېوادونو کې له افغان چارواکو سره د ویډوي کنفرانس له لارې هغوی ته سپارښتنه وکړه چې د عاجلو روغتیایي مرستو د جلب لپاره لاس په کار شي.
ښاغلي اتمر ټینګار کړی چې د افغانستان ټول ډیپلوماتیک استازي باید له کوربه هېوادونو او نړیوالو بنسټونو سره د بېړني اکسیجن او روغتیایي وسایلو د برابرولو لپاره په اړیکه کې شي او د اقداماتو غوښتنه ترې وکړي.
نوموړي په لومړي او دویم پړاو کې د افغانستان د دوستو هېوادونو له مرستو او همکاریو مننه وکړه او زیاته یې کړه چې افغان دولت او ولس تمه لري څو دغه هېوادونه د کورونا په درېیم پړاو کې هم له افغانستان سره خپل مرستې جاري وساتي.
هغه د روغتيايي سکتور اړتیاو ته په اشارې سره وویل چې افغانستان د اکسیجن، د اکسیجن د تولید ماشینونو، ټانکرونو او سلنډرونو ته اړتیا لري.
محمد حنیف اتمر داسې مهال دا څرګندونې کوي چې د روغتیايي چارواکو په وینا د کورونا درېیمه څپه مخ په زیاتېدو ده.
د افغانستان د بهرنیو چارو وزارت خبرداری ورکړی، که خلک د کورونا درېیمه څپه جدي ونه ګڼي او پاملرنه ونه کړي نور درانه ځاني او مالي زیانونه به وویني.