تاند – په داسې حال کې چې د کورونا د پېښو شمېر ورځ تر بلې مخ په زیاتېدو دی، ولسمشر اشرف غني وایي چې د افغانستان حکومت د کورونا وبا د دریېمې څپې مهارولو ته بشپړ چمتوالی لري.
د ارګ په خبرپاڼه کې چې نن یکشنبه/ د جوزا ۹مه خپره شوې په کې راغلي چې ولسمشر غني دغه خبره نن غرمه د روغتیا وزارت له مسؤلینو سره د ناستې پر مهال وکړه.
د خبرپاڼې له مخې، نوموړي د عامې روغتیا وزارت مسؤلینو ته سپارښتنه وکړه چې د کورونا ویروس د مخنیوي لپاره دې هم بېړني اقدامات وکړي.
ارګ وايي، ولسمشر دغه راز د عامې روغتیا وزارت د راپور د ارزونې پر مهال وویل، حکومت د کورونا وبا کنټرولو لپاره چمتوالی لري خو په خبره یې، نړیوال روغتیایي بنسټونه دې د مؤثرې همکارۍ په موخه له افغانستان سره خپلې ژمنې په بشپړ ډول تطبیق کړي.
د هغه په خبره چې د خلکو د واضح عامه پوهاوي ترڅنګ دې له منابعو څخه د ښې ګټې اخیستنې لپاره ولایتي ادارې لا منسجمې او مسؤلیتونه واضح شي.
ولسمشر غني داسې مهال د کورونا د درېیمې څپې پر وړاندې د بشپړ چمتووالي خبره کوي چې د پلازمېنې کابل په ګډون د هېواد په ۱۶ ولایتونو کې د کورونا د پېښو د زیاتوالي له امله ښوونیز مرکزونه د دوو اونیو لپاره رخصت اعلان شوي دي او په کابل کې د ودونو تالارونه هم تړل شوي.
د افغانستان د عامې روغتیا وزارت نن وویل چې په تېرو ۲۴ ساعتونو کې په هېواد کې د کورونا ۹۲۹ نورې مثبتې پېښې ثبت شوې دي او په همدې موده کې پر کورونا ناروغۍ اخته ۲۵ کسان مړه شوي هم دي.
د دغه وزارت د معلوماتو له مخې، له تازه ثبت شویو شمېرو سره په هېواد کې پر کورونا د اخته کسانو ټول شمېر ۷۱ زره او ۶۹۰ تنو ته، د مړه شویو کسانو شمېر ۲ زره او ۹۴۴ ته او د بېرته رغېدلیو هغه بیا ۵۷ زره او ۲۸۱ ته لوړ شوی دی.