تاند(یکشنبه، د جوزا ۸) د امریکايي او پاکستاني رسنیو د راپور له مخې، د امریکا د ولسمشر جو بایډن اداره هڅه کوي چې د ۲۰۲۲ مالي کال په بودجه کې پاکستان ته د اقتصادي او اجتماعي مرستو ترڅنګ د پاکستاني پوځ د پرسونل د روزنې لپاره هم پیسې ځانګړي کړي.
ویل کېږي چې امریکا وروسته له دې پاکستان ته زیاتې مرستې په پام کې نیولې چې دغه هیواد د افغانستان پر سر د همکارۍ لپاره ځینې پټې ژمنې متحدو ایالتونو ته ورکړې.
جو بایډن د جمعې په ورځ د ۲۰۲۲ مالي کال لپاره ۶ تریلیون ډالره بودجه اعلان کړه چې د امریکا په تاریخ کې تر ټولو لویه بودجه ده.
په دې بودجه کې د غیردفاعي چارو په تېره بیا د ټولنیزو پروګرامونو او د بیخ بنايي پروژو لپاره د ۱۶ سلنه اضافي بودجې غوښتنه شوې ده.
د دفاعي چارو لپاره د ۷۱۵ ملیارد ډالرو بودجې وړاندیز شوې چې تر تېرو کلونو په سلو کې ۳ سلنه لږه ده. په ۲۰۲۲ م کال کې به په افغانستان او عراق کې امریکا ۳ ملیارده او ۲۰۰ ملیون ډالره وسپموي.
خو د افغان امنیتي او دفاعي ځواکونو لپاره تر تېرو کلونو ۹ اعشاریه ۲ سلنه زیاتې پیسې غوښتل شوي دي.
د امریکا د بهرنیو چارو وزارت په بودجه کې د پاکستان لپاره هم له څو کلونو ځنډه وروسته د لومړي ځل لپاره بودجه په پام کې نیول شوې ده او ویل شوي چې د کانګریس غړیو ته هم قناعت ورکړل شوی دی. په تېرو کلونو کې د کانګریس غړیو پاکستان ته د مرستو له ورکولو سره سخت مخالفت کاوه.
د امریکا د بهرنیو چارو وزارت له لوري د جمعې په ورځ کانګریس ته په استول شوې وړاندیزي بودجه کې په پاکستان په ځانګړي ډول د افغانستان پولو ته نژدې په خیبرپښتونخوا کې د دیموکراتیکې حکومتولۍ د پیاوړتیا، او په افغانستان کې له سولې سره د مرستې لپاره په دې سیمه کې د تشدد د کمولو لپاره د پروژو غوښتنه شوې ده.
د پاکستان له مرکزي حکومت او د پوځ د روزنې لپاره د دفاع وزارت او نورو ادارو وړاندیز شوې پیسې له دې جلا دي.
د ایشیاټایمز د راپور له مخې، پاکستاني چارواکي وايي چې په افغانستان کې د مځکني او هوايي ملاتړ لپاره له امریکا سره هغه موافقه، چې په ۲۰۰۱ م کال دواړو خواوو کړې وه، لا هم پر خپل حال ده.
د امریکا حکومت د جنوبي اسیا او منځنۍ اسیا د هیوادونو لپاره هم د سلګونو ملیون ډالرو بودجه کانګریس ته د تصویب لپاره وړاندیز کړې ده.
امریکا په ۲۰۱۸ م کال د پاکستاني پوځیانو د روزنې پروګرام وځنډاوه او ویې ویل چې پاکستان افغان طالبانو ته پټنځایونه ورکوي. د ۲۰۱۹ په جولای کې یې د پاکستان د ایف شپاړس الوتکو د تخنیکي ملاتړ لپاره ۱۲۵ ملیون ډالره پاکستان ته ورکړل چې دا مرسته تر پخوانیو خورا لږه وه.
د ۲۰۰۱ او ۲۰۰۸ کلونو ترمنځ د امریکا متحدو ایالتونو پاکستان ته ۲۳ ملیارد ډالره او د ۲۰۰۸ او ۲۰۱۳ ترمنځ ۱۴ ملیارد ډالره مرسته ورکړې ده.
یاره دا آمریکایی ډالر په افغانستان کی صرف حرام دی