تاند — د افغانستان د صنعت او سوداګرۍ وزارت په روان کال کې د غاليو د صادراتو د لا زیاتېدو خبر ورکوي.
دغه وزارت وايي، په امريکا، جرمني او عربي متحدو اماراتو کې د غاليو د پلورنې لپاره د دايمي بازارونو د جوړولو لپاره کار روان دی چې د لنډ مهالو او اوږد مهالو نندارتونونو په جوړولو سره صنعت کاران کولاى شي په دغو بازارونو کې خپل توليدي محصولات وپلوري.
د صنعت او سوداګرۍ وزارت ویاند فواد احمدي نن چهارشنبه/ د جوزا ۵مه/ وویل، د غاليو سوداګرو ته د هڅونې او ملاتړ په هدف د ۶ سلنه صادراتو پیسې وزارت ورکوي چې په دې سره، به په روان کال کې په هېواد کې د غاليو د صادراتو کچه لوړه شي.
د فواد احمدي په خبره، دغه وزارت د نړيوالو مرستندويو بنسټونو په ملاتړ په نږدې راتلونکې کې د غاليو د توليداتو او صادراتو د زياتوالي لپاره له ګټې پرته پورونه برابروي.
تر دې مخکې یاد وزارت ویلي و چې د افغانستان په نوم او نښان د غاليو د توليد، اوبدلو، مینځلو او صادراتو لپاره ټول تخنيکي امکانات برابروي چې له دغې برخې څخه د زيات ملاتړ زمينه برابره شي.
ښاغلي احمدي د تېرې شنبې په ورځ وویل په داسې یوې طرحې کارکوي چې تر راتلونکو شپږو مياشتو به د هېواد ټول محصولات د افغانستان په خپل نوم نورو هېوادونو ته صادر شي.
نوموړي زیاته کړه، هند او فرانسې ته د افغانستان د صادراتي محصولاتو لپاره د بااعتباره سرټيفکيت د ترلاسه کولو پر پروګرام کار پیل کړی دی چې د دې سند په اخيستلو سره به د نورو هېوادونو په نوم بهر ته د افغانستان د صادراتي مالونو د صادرولو مخه ونيول شي.