تاند(سه شنبه، د جوزا ۴) د امریکا د بهرنیو چارو وزیر انټوني بلینکن ویلي چې نړیواله ټولنه به وهڅوي څو له غزې سره مرسته وکړي.
نوموړي نن د اسراییل له لومړي وزیر بنیامین نتانیاهو سره تر لیدنې وروسته ویلي چې امریکا به په غزه کې د ناوړه بشري وضعیت د ښه کېدو لپاره خپلو هلو ځلو ته دوام ورکړي.
نوموړي زیاته کړې چې دوی به د خپلو متحدینو په ګډون له غزې سره مرسته وکړي او دغه راز امریکا غواړي ډاډ تر لاسه کړي چې حماس ډله به له یادو مرستو ګټه نه تر لاسه کوي.
د ویلو ده چې په غزه کې تېره اوونۍ اوربند وشو خو تر هغه وړاندې اسراییل پر غزې خونړۍ بمباري وکړه چې د ټولې اسلامي نړۍ توند غبرګونونه یې را وپارول.
د یادونې ده چې تېره ورځ د امریکا نامتو ډیموکراټ سناتور برني سندرز ویلي چې د اسراییل لومړی وزیر یو توکمپال او ظالم شخص دی.
سندرز له سيبيایس سره په مرکه کې زیاته کړې چې د فلسطین په غزه کې د وروستي تاوتریخوالي لامل نتانیاهو دی او نوموړی باید په یاده سیمه کې د ترسره شوي جنایت په اړه ځواب ویلو ته اړ کړل شي.
نوموړي دغه راز په غزه کې پر تلپاتې اوربند د ټینګار تر څنګ زیاته کړې چې د امریکا سنا جرګه شاهده ده چې په تېره یوه لسیزه کې د فلسطنیانو پر وړاندې د اسراییل د ترسره شویو ظلمونو بنسټګر نتانیاهو دی.