تاند (دوشنبه د جوزا ۳) د افغانستان د کرنې اوبو لګولو او مالدارۍ وزارت وایي، د تېر کال په جریان کې د هېواد په بېلابېلو ولایتونو کې ۴۱ زره او ۸۵۵ مټریک ټنه کونځلې تولید شوې دي.
د دغه وزارت د احصایې ریاست د معلوماتو له مخې، تېر کال په افغانستان کې پر ۶۵ زره هکټاره ځمکه کونځلې کرل شوې وې.
خبرپاڼه زیاتوي، تر ټولو ډېرې کونځلې په فاریاب، جوزجان، سرپل، بلخ، سمنګان، تخار، بغلان او هلمند ولایتونو کې تولید شوې دي.
د کرنې وزارت وايي له دغه نبات څخه غوړي اېستل کېږي، د خوړو د خوند په ښه کولو او د پوستکي د روغتیا او پیاوړتیا په موخه هم کارول کېږي او دغه راز د کونځلو غوړي د شکرې ناروغي د مخنیوي په برخه کې مهم رول لري.