تاند (شنبه د جوزا ۱) د افغانستان د صنعت اوسوداګرۍ وزارت وایي پر داسې یوې طرحې کارکوي چې تر راتلونکو شپږو مياشتو به د هېواد ټول محصولات د افغانستان په خپل نوم نورو هېوادونو ته صادر شي.
د دې وزارت ویاند فواد احمدي ویلي چې دې وزارت هند او فرانسې ته د افغانستان د صادراتي محصولاتو لپاره د بااعتباره سرټيفکيت د ترلاسه کولو پر پروګرام کار پیل کړی دی.
د نوموړي په خبره چې د دې سند په اخيستلو سره به د نورو هېوادونو په نوم بهر ته د افغانستان د صادراتي مالونو د صادرولو مخه ونيول شي.
له دې مخکې د افغانستان محصولات د نورو هېوادونو په مارک بهر ته صادریدل چې سوداګرو ته یې ګڼې ستونزې را ولاړې کړې وې.