تاند ( جمعه، د ثور ۳۱مه) د ناټو عمومي منشي ینس ستولتبرګ نن په پاریس کې د فرانسې له ولسمشر ایمانویل مکرون سره په یوه ګډه خبري غونډه کې وویل، په افغانستان کې د ناټو د ځواکونو د حضور پای ته رسېدو سره نوی فصل پرانیستل کیږي.
سټولنټبرګ زیاته کړه له افغانستان څخه د ناټو راتلونکی ملاتړ به پر درې اصلي محورونو راڅرخي.
د سلا مشورو او وړتیاوو رامنځ ته کولو په برخو کې د افغانستان د امنیتي ځواکونو دوامداره ملاتړ ، پر ځانګړو ځواکونو تمرکز او له افغانستان څخه بهر دوی ته پوځي روزنه او د کابل د هوايي ډګر د فعالیت په شمول د خدمتونو د وړاندې کولو لپاره د بودیجې برابرول هغه څه دي چې سټولټنبرګ پرې ټینګار درلوده.
د یادونې ده ، چې تر دې وړاندې د امریکا د لوی درستیزانو د کمیټې مشر جنرال مارک میلي د مې د میاشتې په شپږمه نیټه ویلي وو، چې په نورو هېوادونو کې د افغان امنیتي ځواکونو د روزنې په اړه غور کوي.
ناټو په ۲۰۱۴ م کال کې افغانستان خپل جګړیزه ماموریت پای ته ورسوه او د غوڅ ملاتړ ملاتړ ماموریت یې پیل کړ ، چې پرمهال یې افغان ځواکونو ته روزنه او سلا مشورې ورکولې.
دغه راز په اپریل میاشت کې امریکا د ولسمشر جو بایډن له اعلان سره هم مهال د ناټو پوځي تړون هم اعلان وکړ، چې سرتیري به یې د سیپټمبر تر یولسمې نیټې له افغانستان څخه ووځي.
ناټو په خپله وېب پاڼه لیکلي، چې سټولټنبرګ او مکرون د ناټو د راتلونکې سرمشریزې، په افغانستان او عراق کې له ترهګرۍ سره په مبارزې او ځینو نورو مسالو هم خپلو کې خبرې کړي دي.
سټولتنبرګ او مکرون داسې مهال خپلو کې سره د افغانستان پر مسایلو خبرې کوي، چې ټاکل شوې د ناټو د مشرانو غونډه د جون په څوارلسمه نیټه جوړه شي.