تاند(شنبه، د ثور۲۵) په کونړ ولایت کې یو شمېر ځوانانو د سړکونو، ویالو او کوڅو د جوړولو لپاره اشر کړي او همداراز یې ژمنه کړې چې په خپل ولایت کې به د ټولګټو پروژو ساتنه کوي.
د کونړ ولایت د مرکز اسعداباد او د نورستان د مرکز پارون ترمنځ د کونړ د شګۍ د سیمې ځوانانو د حکومت او موسسو له ملاتړه پرته په خپل لګښت او زحمت د سړک جوړولو ته ملاوې تړلي دي.
دوی سره له دې چې د سړک جوړولو لپاره عصري وسایل نه لري خو له سطلونو، زمبېلونو او بېلونو څخه په استفادې سړک ترمیموي.
تر دې وړاندې د دایکنډي د یوه کلي اوسېدونکو خپل کلیوالي سړک په ورته ډول په اشر جوړ کړ. همداراز د خوست او پکتیا په څو سیمو کې ځوانانو راز راز ټولنیز کارونه بې پیسو وکړل.
د کونړ د شګۍ د سیمې ځوانان وايي، په خپل لګښت او خولو خپل سړک جوړوي او په دې توګه غواړي ولس ته د سړکونو او نورو ټولګټو پروژو اهمیت وښيي.
هغوی وايي، سړکونه او نورې پروژې په ټول ولس پورې تړاو لري او باید ولس د هغو په جوړولو او ساتلو کې برخه واخلي.
دغو ځوانانو د سړک د جوړولو لپاره په خپلو پیسو سمینټ، شګې او نور وسایل رانیولي او د اشر په ډول یې جوړوي.
د اسعداباد – پارون سړک ۴۰ کیلومتره د ۲۰۰۶ او ۲۰۰۹ کلونو ترمنځ په اساسي ډول پوخ جوړ شوی و خو ماینونو او چاودنو ویجاړ کړی دی.
د کونړ او نورستان چارواکي وايي چې حکومت د دې سړک، چې اوږدوالی یې ۱۰۰ کیلومتره دی، د جوړولو لپاره بودجه منظور کړې او ښايي په لنډ وخت کې کار پرې پیل شي.