تاند، یکشنبه، د ثور ۲۸مه: که څه هم مسافرو شکایت کړی چې پاکستاني لوري د تورخم دروازه پرون سهار لس بجې بېرته وتړله خو د ننګرهار چارواکي وايي، تېره ورځ پر دغه لاره ۱۳۵۰۰ تنه په پاکستان کې ایسار پاتې افغانان را تېر شوي دي.
د ننګرهار د والي ویاند عطا الله خوږیاڼی وايي، تورخم ځنځیر تېره ورځ له سهاره د ورځې تر پایه پرانیستی و چې له دې لوري هم ځینې خلک پرې پاکستان ته اوښتي دي.
نوموړی وايي، پرون افغانستان ته د تورخم پر لاره ۱۳۵۰۰ افغانان او له افغانستان څخه پاکستان ته نږدې۵۰۰ بندپاتې پاکستانیان اوښتي دي.
بلخوا یو شمېر افغان مسافرو تاند ته شکایت کړی دی چې پاکستاني ملیشو د سهار په لسو بجو افغانانو د سورلۍ موټرې په جمرود کې بېرته ګرځولې او ورته یې ویل چې لاره تړل شوې ده.
دا په داسې حال کې ده چې د سوداګرۍ وزارت وايي، له کوچني اختر وروسته به تورخم او چمن لارې د سوداګرۍ لپاره په ۲۴ ساعته ډول د اوونۍ شپږ ورځې پرانیستي وي، خو د مسافرو د تګ راتګ په اړه لا مسوولانو څه نه دي ویلي.