تاند (چهارشنبه د ثور ۲۲) د طالبانو د جلا شوې ډلې مرستیال په هرات ولایت کې په یوه وسله وال برید کې سخت ټپي شوی دی.
په هرات کې یوې روغتیايي سرچینې د نوم نه ښودلو په شرط ویلي چې ملا عبدالمنان نیازی سخت ټپي شوی او اوس د هرات په مرکزي روغتون کې تر درملنې لاندې دی.
دغې سرچینې زیاته کړې چې په دغه برید کې ښاغلی نیازی د هغه موټر چلوونکی او یو ساتونکی ټپیان شوي او درې ساتونکي یې وژل شوي دي.
د سرچینې په خبره دغه پېښه تېر ماښام د هرات ولایت د ګذزې او ادرسکن ولسوالیو ترمنځ سیمه کې شوې ده. د هرات سیمه ییزو چارواکو تر اوسه په دې هکله څه نه دي ویلي.
په ملا عبدالمنان نیازي د برید مسؤلیت هم کوم چا یا ډلې په غاړه نه دی اخیستی.
د ملاهبت الله اخندزاده په مشرۍ طالبانو هم، چې ملاعبدالمنان نیازي ته د خپل سیال په سترګه ګوري، څه نه دي ویلي.
د ملا رسول په مشرۍ د طالبانو دغه ډله په ۲۰۱۵ میلادي کال د طالبانو د مشر ملا محمد عمر تر مړینې وروسته رامنځته شوه.
تر دې مخکې هم د افغانستان په یو شمېر جنوب لوېدیځو ولایتونو کې د یادو ډلو ترمنځ د خونړیو جګړو راپورونه ورکړل شوي دي.