تاند (پنجشنبه د ثور ۸) د بلخ ولايت په مرکز مزارشريف ښار کې سلګونو کسانو د سولې او اوربند په ملاتړ او د افغان امنيتي ځواکونو او جمهوريت د خونديتوب په موخه لاريون وکړ.
لاريون کوونکي وایي چې افغان حکومت او طالبان دې د سولې او ثبات په تړاو له رامنځته شوی فرصته ګټه واخلي.
د لاریون والو په خبره چې افغانان نور له جنګه ستړي دي او په هيواد کې د سولې او ټيکاو راتلو ته شېبې شماري.
دوی وايي طالبان بايد د افغانانو غوښتنې ومني او د روژې مبارکې مياشتې په خاطر دې اوربند او سوله وکړي.
د لاریون کوونکو په خبره، افغانان داسې سوله غواړي چې ورسره د تېرو دوو لسيزو لاسته راوړنې خوندي شي او طالبان او افغان حکومت بايد د سولې په پروسه کې له بشپړ انعطاف څخه کار واخلي.
د دې لاریون یو شمېر ښځینه ګډونوالې بیا وايي چې د سولې په کېدونکي توافق کې بايد د هر افغان حقوق خوندي وي او داسې نه چې يو ځل بيا ښځې د سولې قرباني شي او د تحصيل او کار حق ورڅخه واخيستل شي.
باید وویل شي چې په دغه لاريون کې له نړيوالې ټولنې هم غوښتنه وشوه، چې د افغانستان جګړه دې په مسؤلانه ډول پای ته ورسوي.
د لاریون والو په وینا چې نړیواله ټولنه بايد خپل فشار زيات کړي، څو طالبان او د افغانستان حکومت يوه جامع تړون ته سره ورسېږي.
د دغه لاريون په پای کې يو پرېکړه ليک هم خپور شو، چې په کې له طالبانو او افغان حکومت څخه د سملاسي اوربند او سولې غوښتنه شوې وه.
په پرېکړه ليک کې همدا راز د امنيتي بنسټونو، بشري حقونو، فردي ازاديو او د ښځو حقوقو پر خونديتوب هم ټينګار شوی و.