تاند ( پنجشنبه، د ثور ۲) وسلوالو طالبانو د ننګرهار ولایت د خوګیاڼو ولسوالي د وزیرو په پیرخېلو سیمه کې خلک په زوره د خپل قوماندان نیک محمد رهبر جنازې ته ورغونډ کړل.
د تیرې دوشنبې په ورځ د وري په ۳۰مه مازیګر ناوخته نامعلومو وسله والو د طالبانو يو مهم نظامي قوماندان مولوي نیک محمد رهبر د کوزې پښتونخوا د پيښور د حاجي کېمپ په سيمه کې وواژه.
په دغه برید کې له رهبر سره د وسله والو طالبانو د ښاري شبکې مسوول عزيزالله مشهور په مصطفی په ګډون دوه تنه ټپيان هم شول.
د وسله والو طالبانو د دې قوماندان تر وژل کېدو وروسته د ننګرهار والي پر ټویټر ولیکل: «د ننګرهار لپاره د وسله والو طالبانو يو مهم نظامي قوماندان مولوي نیک محمد رهبر نن دوشنبه مازیګر ناوخته د کوزې پښتونخوا د پيښور حاجي کیمپ سيمه کې وژل شوی او د ښاري شبکې مسوول عزيزالله مشهور په مصطفی په ګډون يې دوه ملګري ټپيان شوي.»
د ننګرهار والي نه و ویلي، چې د طالبانو دغه مهم قوماندان څنګه او چا وژلی دی، خو لیملي یې و چې نوموړی د ننګرهار لپاره د وسله والو طالبانو یو له مهمو قومندانانو ګڼل کېده چې په دې ولایت کې د زیاترو بریدونو پلان جوړونکی هم و.
د طالبانو د یاد قومندان له وژل کیدو وروسته د پاکستان لپاره د داعش ډلې اعا وکړه چې نوموړی د دوی له خوا وژل شوی او یو شمیر ملګري یې ورته ټپیان کړي دي.
د طالبانو یو ویاند ذبیح الله مجاهد هم منلې وه چې مولوي نیک محمد رهبر د دې ډلې یو مهم قوماندان و او په پېښور کې ووژل شو. خو دا یې نه دي ویلي چې دا قوماندان د چا له خوا او ولې ووژل شو.
مجاهد ویلي چې دا قوماندان په اصل کې د ننګرهار و، خو له پخوا په پېښور کې کډوال و.
د هغه په خبره، دغه قوماندان د روژې د تېرولو لپاره هلته خپلې کورنۍ ته ورغلی و، چې ووژل شو.
د طالبانو ویاند دغه راز زیاته کړې چې د نوموړي قوماندان جنازه یې د ننګرهار خوږیاڼو ولسوالي کې ادا کړه او همدلته خاورو ته وسپارل شو.
سیمه ییزې سرچینې وایي چې یاد قوماندان په اصل کې د ننګرهار د خوږیاڼو ولسوالي اوسیدونکی و، نو ځکه یې جنازه د یادې ولسوالي په «پیره خیلو» سیمه کې ادا شوه او په زرګونه ځایي خلکو په کې ګډون کړی وو.
د دې سیمې اوسیدونکی زوبیر احمد تاند ته وویل چې طالبانو په جوماتونو کې د هغه د جنازې اعلان وکړ او خلک یې وګواښل څو ټول یې په جنازه کې ګډون وکړي.
هغه وایي: ((طالبانو د شپې په جوماتونو کې اعلان وکړ چې د رهبر جنازه راوړل شوې او باید غټ واړه ټول پکې ګډون وکړي))
زبیر احمد چې خپله هم د رهبر د جنازې ګډونوال و، وایي په جنازه کې یې زرګونه خلکو ګډون کړی وو خو وایي ټول طالبانو په زوره ګډون ته مجبور کړي وو.
له بلې خوا د ننګرهار امنیتي چارواکي هم د وسلوالو طالبانو د دې نظامي قوماندان په جنازه کې د ډېر شمېر خلکو ګډون پر ځایي خلکو د وژل شوي قوماندان له ډلې او کورنۍ د خلکو وېره ښیي.
دا په داسې حال کې ده چې دا د وسله والو طالبانو دریم مهم قوماندان دی چې په دې وروستیو څو میاشتو کې په پېښور کې وژل کیږي.
افغان چارواکي تل ادعا کوي چې د پاکستان حکومت د وسله والو طالبانو مشرانو ته پناه ځایونه او جنګیالیو ته یې د روزنې مرکزونه ورکړي دي، خو پاکستان تل بیا دا خبرې رد کړې دي.