تاند- د اسکا په نوم یوې نوې تاسیس شوې امریکايي کمپنۍ اعلان وکړ چې څلورکسیز الیکترونیک موټر یې جوړ کړی چې الوتلی هم شي.
دا موټر به پر دې سربېره د قاتېدا وړتیا هم ولري.
اسکا کمپنۍ وايي چې د دې موټر لومړنۍ نمونې یې په ۲۰۱۹ م کال جوړې کړي خو لومړنۍ نمونه یې د درو سپرلیو لپاره وه خو دا یوه د څلورو تنو لپاره ده.
دا موټر، چې ۶ څرخونه لري، ظاهراً یوې څرخکې ته ورته دی. له مځکې په عمودي ډول پورته کېږي او په همدې ډول کښېني هم.
کله چې پر مځکه کښېناست، وزرونه یې په اتومات ډول راټولیږي چې لږ ځای ونیسي.
دا الیکترونیک موټر په یو چارج تر ۴۰۰ کیلومترو پورې مزل کولی شي او د سرعت عظمي حد یې په ساعت کې ۲۴۰ کیلومتره دی.
اسکا کمپنۍ غواړي چې په راتلونکې کې د دې موټر یو بل ماډل جوړ کړي چې په هایدروجن چلېږي او ممکن سرعت یې تر اوسني هغه زیات وي.
د دې موټر، چې د ۲۰۲۲ کال په وروستیو کې به بازار ته راووځي، بیه ۷۸۹ زره ډالره وي.