تاند (شنبه د حمل ۲۸) بادغیس کې د مسافرو د موټر چپه کېدو پېښه کې درې کسان مړه او ۱۳ نور ټپیان شوي.
د بادغیس روغتیايي مسؤلان وايي، د دغه ولایت په مقر ولسوالي کې یو مسافر وړونکی موټر چپه شوی چې له امله یې درې کسان مړه او ۱۳ نور ټپیان شوي دي.
د مسؤلانو په خبره، دا پېښه پرون مازدیګر هغه مهال رامنځته شوه چې یو فلاینکوچ موټر د مقر ولسوالۍ په کوهخره سیمه کې له هرات څخه فاریاب ته پر لاره و او چپه شو.
د بادغیس د ولایتي روغتون مسؤلینو ویلي، په مړو شویو کسانو کې ۳ نارینه او په ټپیانو کې هم ۷ نارینه، درې ښځې او درې ماشومان شامل دي. دغه راز د درې ټپیانو روغتیايي وضعیت نازک ښودل شوی.
ویل کېږي چې د پېښې ټول قربانیان د فاریاب اوسېدونکي دي او لامل یې هم د موټرچلوونکي بې احتیاطي ښودل شوې ده.