تاند ( دوشنبه، د حمل ۲۳) امنیتي سرچینې وایي، تېره ورځ د ارغنداب ولسوالۍ اړوند ژوندو هدیره او بابرو سیمه کې پر یوه زرنج او موټر سایکل ځای پر ځای شویو ماینونو چاودنې کړي او شپږ ملکیان یې وژلي.
بل لورته بیا د کندهار د عامې روغتیا روغتون مسوولان وايي، د یادې ولسوالۍ د ناګهان، خالېشک او منارې کلیو څخه شپږ ملکیان د ماین چاودنو له امله په ټپي حالت کې ور وړل شوي دي.
امنیتي مسوولین له عامو خلکو غواړي، چي د دوی له اجازې پرته خپلو سیمو ته د بېرته ورګرځېدو هڅه ونه کړي.
دوی وایي په ګڼو سیمو کې له جګړو وروسته د دولت مخالفینو په کلیو، کورونو او باغونو کې ماینونه خښ کړي او اوس هم پاتې دي.
د یادونې ده، چې ارغنداب ولسوالي پنځه ورځې وړاندې افغان ځواکونو له طالبانو څخه پاکه اعلان کړه.
چارواکي وایي، د طالبانو د ایښودل شویو ماینونو د شنډولو عملیات اوس هم دوام لري.